Ungmennafélagið Katla

Ungmennafélagið Katla var stofnað mánudaginn 17. maí 2008, þegar að Ungmennafélagið Drangur og Ungmennafélagið Dyrhólaey sameinuðust. Til að byrja með voru félögin sameinuð til reynslu í þrjú ár, en eftir gott samstarf varð sameiningin að fullu, og félagið starfar í dag sem eitt. Fyrsta stjórn félagsins var jafnframt kosin á stofnfundi, og skipuðu hana: Guðný Sigurðardóttir formaður, Sveinn Þorsteinsson varaformaður, Þorbjörg Kristjánsdóttir gjaldkeri, Petra K. Kristinsdóttir ritari og meðstjórnandi Andrína Erlingsdóttir.

Ungmennafélagið Katla stendur fyrir öflugu íþróttastarfi fyrir börn og fullorðna og hafa öll árin verið í boði Frjálsar íþróttir og Knattspyrna auk ýmissa annara greina sem boðið hefur verið upp á að hverju sinni eftir aðstæðum og má þar sem dæmi nefna: Box, Körfuknattleikur, Badminton, Ultimate Frisbee, Þrekæfingar, Fimleikar auk ýmissa annara námskeiða og eflaust annara greina sem hér gleymast. Auk íþróttastarfsins heldur Ungmennafélagið Katla þrettándagleði, sem jafnframt er uppskeruhátíð félagsins, þar sem farið er yfir starf fyrra árs og veittar viðurkenningar. Ungmennafélagið Katla heldur einnig árlegt Páskamót í Dymbilviku og sér um 17.júní skemmtun í Mýrdalshreppi.